Bergtour mit Jubiläumspickel Alois

01./02. Oktober 2023 mit Marianne Scheitlin und Erich Sommer

Judihui I darf z'Bärg mit Marianne/Erich mit zwei Alte! D'Marianne kenni nid, si isch ä Ystigeri i däm Bergsport. Aber I bi sicher, Ihre chani hälfe, wenn i de im rächte Moment ygsetzt wirde. U vo dene wird's einigi gä... Erich kenni guet, mit ihm hani scho so einiges erläbt, i gloube, är hed mi gärn, will är nimmt mi viel i d'Bärge mit. Mit mire Eleganz u Effizienz hani d'em Erich scho oft Halt gä.

Stufe schla

Das isch mini schönschti Domäne, will ä gueta Tritt isch für alli Bärgstiger wichtig. Weme de i Tritt schteid, git's de grossi Sicherheit, spart Chraft, git Rhythmus usw. Wichtig: z'Wasser darf nid usem Tritt loufe, u z'Bärner Drieck muess der Schuehabsatz so fyn i Tritt drücke. U zletscht macht's de d'Bärgstiger viel Freud. Aber äbe mi muess mi ysetzte.

Ritze

Das machini bsunder's gärn. Da chani mit viel Effe so schö dür d'Luft flühge. U we de d'Egge vo de Schufle so schö präzis harmonisch dür di herti Schneedecki gschlage/zoge wird, de git's de ä feina Halt für di Bärgstiger.

Stütze

I bi nid i erschter Linie gmacht für das, aber we de z'Isch stoziger wird, de stütze sich di Bärgstiger uf mir ab. U we sie de no äs Handgriffli mache, de füehlt sich das rächt guet a im steile Isch. Und obe ar Kante wird de no Bühlertechnik agwendet.

Apéro

Das isch grossartig, will alli mini filigrani Form bestuune und alli tüe mi so fyn striichle. Bi halt doch öppis Speziells vergliche zu de andere Industrie Pickla. Ja mi hed der Bhend Ruedi vo Hand gschmidet.

Ufem Gipfel

Äs freut mi sehr, dass alles guet gange isch u i mi Teil ha chönne bytrage. I gniesse o d'Ussicht, u wenn i de no hei gseh de freuts mi sehr, hei z'luege.